Su sartu de Samugheo este in d'unu pranu artu de treghentosettantachimbe metros, chi s'agattada tra sa parte arta de su Campidanu e sa Barbagia de Belvì su sartu 'e Samugheo este tzerriadu Brabaxianna. Arzando dea su Campidanu sia de Casteddu che de Aristanis agattaus una cadena de orroccas non troppu artas, ma gianta subbitu a s'ogu po su cuntrastu chi creanata.
In parte funti de origine calcarea, treballadas dea su entu, cun iscrebigos soltiarios e ispelluncas chi gianta vida a una vista fascinosa e forte. In custas orroccas bividi una discreta populazione de istorittos, piggiones e iscraffaiones, unu tempus naianta ca 'nche fudi fintzes s'unturgiu.
S'unicu frumene chi non si siccada est s'Araxisi, chi in contrastu cun is orroccas 'i contribuidi a giaere un'aspettu caratteristicu a tottu sa zona. Su sartu 'e Samugheo est fattu de terras de medas calidades, comente medas funti is minerales de orrocca, is linnas e fintzes su tipu de s' aera. Su sartu 'e Samugheo este divididu in cussorgias mannas : Acoro, Abbasassa, Su Padru, Is Pranos, Pranu 'e lacos e atras prus pittias.
Is Pranos furinti is coiggios de sa chiudenda famosa e furinti abbarraos a su comunu, po cussu dos tzarrianta fintzes "Is Comunales", unu tempus ddhos paschianta solu is poboros chi furinti abbarraos chenza terra. Is terras prus bellas funti in Abbasassa e in Su Padru.
Pranu 'e lacos est una cussorgia prus orrugada e prena de accos e cun pagu abba. Acoro est una terra de arena, bascia, cun orroias e fenadorgios, e infattis ddhue faente is bingias e is ortos in s'istade. S'aghina variada dea su muristellu a su cannonau, malavasìa, niedda manna, monica, muscadeddu e nasco. Su sartu 'e Samugheo de Samugheo cunfinada cun su de Meana, Laconi, Asuni, Orruinas, Srògono, Atzara, Usache, Allai, Ortueri.
Is mattas de suergiu funti in donni logu, ddhu ada crecos, lestincos, iddhostres, linnabros, illighes. Ddhu ada mattas de ollia chi attinti discretamente, purtroppo sa mancanza de s'abba cunditzionada sa presentzia de atras mattas chi este seguru pianta a creschere: commente a sa pira e a sa mela, su pessighe e su piricocco, e s'arangiu e su limone.
A giassos due faede sa nughe, sa mendula, sa cheressia, sa figu, ddhue faede bene sa pruna. In is mengius terras due faede su trigu, s'orgiu e s'avena e bellos erbaios de foraggiu. In is ortos due faede bene sa tamata, su pisu, sa patata, sa crucuriga, s'aeda, sa latuca, su pedringianu, s'appiu, e in misura prus pittia sa sìndria e su melone.
Is animales funti brebese e is baccas, calecunu taggiu de crabas e medas procos chi onni familia 'i tenede po provistas de sartitzos e prosciuttos. In su sartu 'e Samugheo du ada margianes e pedrighees, truturis e sribones.
Ddhue faede su cadrulinu de petza e su cadrulinu de mudeghu. Tottu sa zona este circondada de bellos boscos cun sa presentzia de ebras aromaticas e curativas.
Istoria << >> Sambenaos de Samugheo